Əcnəbilər üçün Azərbaycan ali məktəbləri

Əcnəbilər üçün Azərbaycan ali məktəbləri

Xaricdə təhsil bütün dünyada populyardır. Dünyanın hər yerindən öz ali məktəblərinə əcnəbi tələbələri qəbul edən Azərbaycan da istisna deyil.


Xaricdə təhsil bütün dünyada populyardır. Dünyanın hər yerindən öz ali məktəblərinə əcnəbi tələbələri qəbul edən Azərbaycan da istisna deyil. Azərbaycan Respublikasının ali məktəbləri artıq uzun müddətdir ki, başqa dövlətlərin vətəndaşlarına açıqdır. Əcnəbilərin Azərbaycanda təhsil almasını həyata keçirən ali məktəblər arasında bunları qeyd etmək olar:

  1. Bakı Dövlət Universiteti;
  2. Azərbaycan Dövlət Neft Akademiyası;
  3. Azərbaycan Texniki Universiteti;
  4. Azərbaycan Tibb Universiteti;
  5. Azərbaycan Dövlət Mədəniyyət və İncəsənət Universiteti;
  6. Azərbaycan Memarlıq və İnşaat Universiteti;
  7. Bakı Musiqi Akademiyası

Sadalanan ali məktəblər güclü maddi-texniki bazaya və yüksək səviyyəli müəllim heyətinə malikdir. Bakı və respublikanın digər şəhərlərində yerləşən ali məktəblər, məsələn, Gəncə Dövlət Universiteti, Naxçıvan Dövlət Universiteti və Sumqayıt Dövlət Universiteti müxtəlif ölkələrdən tələbələr qəbul edir.

Ölkəmizdə bəzi əcnəbi tələbələr dövlətlərarası müqavilə əsasında dövlət proqramı üzrə təhsil alır. Lakin tələbələrin əksəriyyəti ali məktəblə sərbəst şəkildə razılaşma imzalayaraq ödənişli əsaslarla təhsil alır. Azərbaycanla qonşu ölkələrin vətəndaşlarından əlavə ölkəmizdə Hindistan, ABŞ, ÇXR, Cənubi Koreya, Yaponiya, həmçinin Avropa ölkələrindən tələbələr təhsil alır. Hal-hazırda ölkəmizdə 60 ixtisas üzrə bakalavr və magistr pilləsində təxminən əlli ölkənin vətəndaşı təhsil alır. Bu tələbələr aspirantura və doktoranturaya da qəbul oluna bilər.

Əcnəbilərin respublikamızda təhsil problemlərindən biri yataqxanalarda yerlərin kifayət qədər olmamasıdır. Bakı universitetlərinin yataqxanalarında yerlər artırılarsa xaricdən tələbə axına güclənər.

Respublikamızda qəbul olunan normativ-hüquqi təhsil aktına əsasən başqa dövlətlərdən olan tələbələrin təhsili bu əsaslarla həyata keçirilir:

- Azərbaycanla xarici dövlətlər arasında elm və mədəniyyət sahəsində dövlətlərarası əməkdaşlıq müqaviləsi və planı üzrə;

- Təhsil Nazirliyi və təhsil strukturları, təhsil müəssisələri və ictimai təşkilatlar arasında bağlanan razılaşma əsasında

-Təhsil müəssisələri arasında bağlanmış birbaşa müqavilələr üzrə;

- qeyri-hökumət və xeyriyyə fondlarının ayırdığı təqaüd hesabına.

Ölkəmizin ərazisində daimi yaşayan xarici vətəndaşlar və vətəndaşlığı olmayan şəxslərin azərbaycanlılar kimi təhsil almaq hüququ var. Digər əcnəbilər isə pullu təhsil (əgər pulsuz təhsil haqqında yuxarıda sayılan müqavilələr yoxdursa) alır. Təhsil haqqı respublikanın Təhsil Nazirliyi tərəfindən  təyin edilir.

Bakıda ali məktəbə qəbul olmazdan qabaq xarici vətəndaşlar hazırlıq kursunu bitirmə haqqında sənəd təklif etməlidir. Kurs başa çatan zaman imtahan təşkil edilir. İmtahanlardan uğurla keçənlərə şəhadətnamə təqdim edilir, bu da öz növbəsində ali məktəbə qəbul olmaq hüququ verir.

Xarici tələbələrlə çalışan kafedralar yeni təhsil proqramı hazırlayıb və təsdiq edib. Magistr dərəcəsi almaq üçün xarici tələbə əvvəlcə ölkəmizdə bakalavr dərəcəsi almalıdır. Əgər tələbə bakalavr pilləsini başqa dövlətdə oxuyubsa, o, eksternat yolu ilə dil kursu keçməlidir.

Azərbaycanda əcnəbilərin təhsili ilə bağlı bütün işlərlə ali məktəbin beynəlxalq əlaqələr üzrə şöbəsi məşğul olur.

Comments (0)